Simba SC imeendelea kuweka hai matumaini yake ya kutwaa ubingwa wa Ligi Kuu Tanzania Bara baada ya kuibuka na ushindi muhimu wa mabao 2-1 dhidi ya Pamba Jiji katika mchezo uliopigwa Uwanja wa KMC Complex.
Mchezo huo ulikuwa na ushindani mkubwa huku timu zote zikihitaji matokeo chanya, lakini ni Simba walioweza kutumia vyema nafasi zao na kuondoka na alama zote tatu muhimu.
Wekundu wa Msimbazi walipata bao la kuongoza kupitia mshambuliaji Elie Mpanzu aliyemalizia kwa ustadi pasi maridadi ya Neo Maema katika kipindi cha kwanza. Bao hilo lilionekana kuwapa Simba udhibiti wa mchezo, lakini Pamba Jiji walionyesha uimara wao kwa kusawazisha kabla ya mapumziko kupitia Mathew Momanyi na kufanya kipindi cha kwanza kumalizika kwa sare ya 1-1.
Kipindi cha pili Simba walirejea uwanjani kwa kasi kubwa wakitengeneza mashambulizi ya mara kwa mara langoni mwa wapinzani wao. Baada ya kushindwa kutumia nafasi kadhaa za wazi, hatimaye kiungo mshambuliaji Libasse Gueye aliibuka shujaa kwa kufunga bao la ushindi baada ya kuwatoka mabeki wa Pamba Jiji na kumalizia kwa guu la kushoto.
Ushindi huo unaipa Simba alama tatu zenye thamani kubwa katika mbio za ubingwa, huku ukiwaendeleza katika presha ya kuwania taji hadi hatua za mwisho za msimu. Simba imekuwa katika kiwango kizuri katika mechi za hivi karibuni, ikifikisha alama 61, alama mbili nyuma ya Yanga yenye alama 63.
Alama hizo zimeifanya Simba kuendelea kusalia karibu na vinara wa ligi katika mbio za ubingwa ambazo zimekuwa na ushindani mkali msimu huu. Kila mchezo uliosalia una umuhimu mkubwa kwa timu hiyo ambayo imeonyesha dhamira ya kupambana hadi dakika za mwisho za msimu.
Tanzania Prisons yapigania uhai wa Ligi Kuu
Katika mchezo mwingine uliochezwa Uwanja wa Sokoine mjini Mbeya, Tanzania Prisons iliendelea kupigania nafasi yake ya kusalia Ligi Kuu baada ya kuifunga Dodoma Jiji mabao 3-1.
Licha ya ushindi huo muhimu, Tanzania Prisons bado inaendelea kujikuta katika mazingira magumu ya vita vya kushuka daraja. Prisons inaendelea kusalia nafasi ya 15.
Lakini matokeo hayo yamewaongeza matumaini katika mechi za mwisho za msimu.
