Macho ya mashabiki wa soka duniani leo yataelekezwa kwenye mechi mbili kubwa za Kombe la Dunia 2026 huku DR Congo ikikabiliana na Ureno, wakati Uingereza itashuka dimbani dhidi ya Croatia katika michezo ya ufunguzi ya makundi K na L.
Katika Kundi K, DR Congo inarejea kwenye fainali za Kombe la Dunia kwa mara ya kwanza tangu mwaka 1974, jambo linaloifanya mechi dhidi ya Ureno kuwa ya kihistoria kwa taifa hilo la Afrika.
Ureno inaingia kwenye mchezo huo ikiwa miongoni mwa timu zinazopewa nafasi kubwa ya kufanya vizuri kutokana na kikosi chake chenye nyota wengi na uzoefu mkubwa wa mashindano makubwa.
Mchezo huo pia unatazamwa kwa karibu kutokana na uwezekano wa Cristiano Ronaldo kuendelea kuandika historia katika kile kinachotajwa kuwa Kombe lake la Dunia la mwisho. Nahodha huyo wa Ureno anatarajiwa kuwa silaha muhimu katika juhudi za timu yake kuanza kampeni kwa ushindi.
Wakati huo huo, katika Kundi L, Uingereza itamenyana na Croatia katika moja ya mechi zinazosubiriwa kwa hamu kubwa. Hii itakuwa kumbukumbu ya nusu fainali ya Kombe la Dunia 2018 ambapo Croatia iliiondoa England na kutinga fainali kwa mara ya kwanza katika historia yake.
Kocha wa England, Thomas Tuchel, amesema mashindano haya ni kilele cha maisha yake ya ukocha na anaamini kikosi chake kiko tayari kuanza safari ya kusaka ubingwa. Hata hivyo, ameonya kuwa Croatia bado ni timu hatari yenye wachezaji wenye uzoefu mkubwa akiwemo Luka Modric.
